O queixo con Chourizo de Porco Celta é unha variedade exclusiva de Campo Capela. É un queixo madurado semigraxo ao que se lle adiciona chourizo de Porco Celta á propia pasta do queixo no momento da súa elaboración, dándolle un toque novidoso. Á codia engadímoslle pementón doce de La Vera, polo que non leva ningún tipo de picante. Ofrécenos unha maridaxe interesante na cociña, tanto con verduras como legumes ou tortillas.

O Queixo de Inverno é un queixo curado (de 3 a 6 meses de maduración) que soamente elaboramos co leite dos meses de outubro a marzo, no que obtemos o mellor leite do ano. Posteriormente, sometémolo a baños de auga e sal para que o seu secado sexa o correcto e obteñamos un queixo perfecto para maridar con viño. Ten ese toque lixeiramente picante no retrogusto que recorda aos queixos que facían as nosas avoas.

O Mouro é un queixo semicurado de pasta branda que tras o seu elaborado infusionamos con café e canela. As notas a leite fermentado e manteiga da pasta e o café e a canela da codia chegan a un punto de equilibrio xusto no que non desvirtuamos a nosa materia prima de calidade: o leite. O produto final é en definitiva unha reinterpretación do noso queixo do país pero con unha combinación de sabores interesante e novidosa. Este queixo obtivo recoñecementos tanto a nivel nacional como internacional. O último foi unha das medallas de ouro do World Cheese Awards 2023, celebrado en Trondheim (Noruega).

É sen dúbida o noso queixo máis tradicional. Seguimos conservando os sabores do pasado, xa que todas as nosas elaboracións son de leite cru. Con poucos días de maduración, destaca pola súa cremosidade e os seus toques a leite fermentado e manteiga. É un produto versátil, xa que o poden acompañar produtos doces como salgados. Os nosos formatos van dende os 450gr ata os 20kg, co que o sabor pode ser lixeiramente diferente dependendo o formato que se consuma

Non cabe dúbida que o Tetilla é o queixo máis famoso fóra das nosas fronteiras. O Tetilla Campo Capela é o único polo momento en elaborar con leite cru dentro da Denominación de Orixe Protexida. Ten un gusto lixeiramente ácido pero suave ao mesmo tempo. O tempo mínimo de maduración para poder iniciar o seu proceso de comercialización é de 10 días. O seu sabor recorda ao leite fermentado e á manteiga.

O requeixo é o selo estrela de CampoCapela. É un produto singular típico da comarca do Eume. Nós seguimos a tradición dos nosos antepasados elaborándoo con leite cru de vaca de alta calidade. Seguímolo colgando en sacos de liño a escorrer e batendo manualmente. Este proceso artesán confírelle ao noso requeixo un sabor único. Está considerado un superalimento polo seu alto valor nutricional e o leite cru permite que sexa un alto probiótico natural polo baixo grado de procesamento do leite.